Bukaerako aldian Galdosek antzerkian interes gero eta handiagoa jarri zuen. Hau susmatzen zen bere nobeletan elkarrizketek hartu zuten garrantziagatik.

Hortik dator bere antzerki lan gehienak bere nobelen moldaketak izatea, izenburu berari eutsiz: Realidad (1892), Doña Perfecta (1896), eta abar. Bere garaian ospetsuena Electra (1901) izan zen.

Zamoran jaio zen arren, Leopoldo Alasek (1852-1901) asturiartzat zuen bere burua. Madrilen irakasle krausistekin egin zuen topo eta kazetari lanetan aritu zen "Clarin" goitizena erabiliz. 1882an Oviedoko Unibertsitatean katedra bat lortu zuen, eta bertan aritu zen hil arte. 1885ean, La Regenta argitaratzeak zalaparta handia eragin zuen giro kontserbadoreetan, Oviedon batez ere.