1848. urtearen bukaeran, Antoine Abbadia Etiopiatik itzuli zen han hamalau urte eman eta gero. Bizitzan aldaketa handia zuen hura; aberatsa zenez, ez zuen bizitzeko lanik egin behar, baina zeregin asko zituen: antzinako harremanak berritu, familiako negozio baztertu samartuei berriro heldu, emaztea bilatu, familiako zenbait arazo konpondu, Afrikatik ekarritako material zientifikoa aztertu eta gogokoen zituen jardueretan murgildu, bereziki behaketa astronomikoak egiten eta ikasten. Zorionez kontserbatzen da trukatu zuen korrespondentzia ugaria.