Pedro de Yrizar-ek Madrilgo Ogasun Ministerioan ingeniari gisa lan egin zuen eta baita Banco de España-ko billete eta zigiluen sailean ere. Gainera Ekonomia irakasten zuen Madrilgo Unibertsitatearen Industri Ingeniarien Eskolan. Madrilen biziz egin zituen, bada, euskarari buruzko ikerketak. Aditza eta dialektologia ziren bere gai kuttunak. Euskalki guztietako aditz laguntzailearen morfologia oso-osorik aztertu zuen. Erdaraz ere idatzi zuen zientzi eta teknologi gaiez Juan de la Cierva Patronatuaren Ciencia aplicada eta Racionalización aldizkarietan.