Luis Villasante Gernikako Errenteria auzokoa zen. Gerra hasi zenean latin-ikasketak bukatu berriak zituen Arantzazun eta nobizio-aldia hastera zihoan. Gerra zela eta jaioterrira itzuli behar izan zuen. Anaiordekoa, fabrika bateko langilea zena, gerrara joan zen Errepublikaren aldekoekin eta Luisek ordezkatu zuen bere lanpostuan. Gernikako bonbardaketa bere aitarekin batera zegoela bizi izan zuen babesleku batean ezkutaturik. Onik irten ziren estutasun hartatik, baina etxerik gabe geratu ziren.