Euskal Herrian historiaurreko artearen aztarna garrantzitsu asko daude, eta horien artean Santimamiñe, Basondo eta Ekain haitzuloetako Paleolitoko horma-pinturak nabarmendu behar dira. Frankokantabriar eskolako pinturak dira, eta beraz Altamira eta Lascauxeko pinturekin loturik daude. Bestalde, mendialdean, Eneolito Aroko hainbat trikuharri txiki ageri dira, abeltzaintzan aritzen ziren giza taldeekin zerikusia dutenak.