Pennsylvaniako aktoreak arrakasta handiko pelikulak egin zituen eta Oscar sarirako ere izendatu zuten, nahiz eta Culver akademia militarrean ikasi. Armadako ingeniaria izateko prestatu bazen ere, Una mujer de Paris, Un gran reportaje eta Senderos de gloria filmen protagonista izan zen.
Adolphe Menjou 1890. urteko otsailaren 18an jaio zen Pittsburghen (Pennsylvania). Hasiera batean ingeniari militar ikasketak egin bazituen ere, (Culver akademia militarrean eta Cornell unibertsitatean ikasi zuen), zineman lan egiteari ekin zion 1916. urtean, antzerkitik salto egin ondoren. The kiss (1916, Dell Henderson) eta Manhattan Madness (1916, Allan Dwan) filmetan hartu zuen parte pantaila handira salto egin zuen urtean.
Aktoreak Lehen Mundu Gerran hartu zuen parte, eta liskarra bukatu zenean zinemara itzuli zen. Garai horretan zinema mutuko lan garrantzitsutan egin zuen lan; besteak beste, aipatzekoak dira El caid (1921), Rodolfo Valentinorekin, Los tres mosqueteros (1921), Douglas Fairbanksekin eta Amor de arabe (1922), John Gilbertekin. Gainera, Menjou Una mujer de Paris (1923) Charles Chaplinen pelikularekin egin zen famatu.
Zinema mutuan lan egin zuen garaian (Katherine Tinsleyrekin ezkondu zen), urte horietako film garrantzitsutan hartu zuen parte: Ruperto de Hentzu (1923, Victor Heerman), Los peligros del Flirt (Ernst Lubitsch), La frivolidad de una dama (1924, Ernst Lubitsch), Figaro en sociedad (1926, Malcolm St. Clair), La gran duquesa y el camarero (Malcolm St. Clair) eta Las tristezas de Satan (1926, D. W. Griffith), beste askoren artean. 1928. urtean, bigarren aldiz ezkondu zen Adolphe Menjou, Kathryn Carver aktorearekin oraingoan. Al servicio de las damas (1927) pelikularen filmaketan ezagutu zuten elkar eta Serenade (1927) eta His private life (1928) lanetan elkarrekin aritu ziren.
Marruecos (1930, Josef von Stenberg), Un gran reportaje (1931, Lewis Milestone), Adios a las armas (1932, Frank Borzage), Gloria de un dia (1933, Lowell Sherman), Little miss Marker (1934, Alexander Hall), Vampiresas 1936 (1935, Busby Berkeley), La via lactea (1936, Leo McCarey), Damas del teatro (1937, Gregory La Cava), Ha nacido una estrella (1937, William Wellman) eta Loca por la musica (1937, Henry Koster) izan ziren 30eko hamarkadan egin zituen film interesgarrienak.
Un gran reportaje pelikulan egindako paperagatik, aktore onenaren Oscar sarirako izendatu zuten Menjou, baina Lionel Barrymorek eraman zuen golardoa (Alma libre). 1934. urtean, Pennsylvaniako aktorea eta Kathryn Carver banandu egin ziren eta Verree Teasdale ezkondu zen. La via lactea (1936) eta Matrimonio al reves (1940) pelikuletan egin zuen lan elkarrekin bikoteak.
40 eta 50eko hamarkadetan, aurreko hogei urteetan baino film gutxiago egin zituen, eta bere ibilbideko azken film aipagarrienak Bailando nace el amor (1942, William Seiter) eta Senderos de gloria (1957, Stanley Kubrick) izan ziren.
Beverly Hillsen hil zen aktorea 1963. urteko urriaren 29an hepatitis baten ondorioz, 73 urte zituela.