Deskripzioa eta oharrak:

Orion dago San Nikolas parrokia, herrigunean. Berez XIII. mendean altxatu zen eliza, baina ondoko mendeetan handitu egin zen eta berrikuntza asko izan ditu, XVI. mendean batez ere.

Gurutze latindar formako oinplanoa du, habearte bakarra, eta kanoi gangaz eta hainbat ganga trenkatuz estalita dago. Absidea angeluzuzena da beheko zatian eta zirkuluerdi formakoa goikoan.

Azpeitiko San Sebastian parrokiakoaren antzekoak ditu gangak: nerbioak ditu, bi hormetan arku eskartzano paraleloak eratzen dituztenak, eta hauek ganga esferikoak kasetoietan zatitzen dituzte; ganga esferikoak apaingarriz hornituta daude.

Barrualdea harlanduzkoa da.

Barrualdean eta kanpoaldean kontrahormak edo ostikoak ditu.

Kanpoaldean azpimarragarria da arkupea, zurezko bilbearekin estalia, eskuineko aldea hartzen duena; hortik, igarobide estali batetik, erretorearen etxera joaten da.

`

Argia eskuinaldeko ataletako bao angeluzuzenetatik, gurutzadurako leiho biribil batetik eta koruko bi leiho txikitatik sartzen da.

`

Barruan Maria Madalenaren irudia nabarmentzen da, XVII. mendekoa.

`