Deskripzioa eta oharrak:

San Nikolas eliza Bilbon dago. Ignazio Iberok, Loiolako basilika eraiki zuen egile berak eraiki zuen, XVIII. mendearen erdialdean.

Habearte bakarra du, pilare handiek eutsitako hiru ataletan zatituta, eta habeartearen bukaeran abside zirkuluerdi formako bat dago, estilo churriguereskokoa. San Nikolas plazatxoan gaudela fatxadari erreparatzen badiogu zera ikusiko dugu: aurrean hiru sarrera, horietako bi alboetan, arku zorrotzekoak, eta beste bat, nagusia, erdian. Sarrera nagusi hori koroatuz frontoi hiruangeluar bat dago, eta bertan txertatuta Bilbo hiribilduko armarria ageri da. Balaustrada batek alderik alde errematatzen du fatxada, eta alboetatik ateratzen diren bi kanpandorre barrokoetatik eta multzoaren erdian, portada gainean, ageri den kanpai hormatik bereizten. Kanpai horman erloju bat dago.

Eraikin osoa harlanduz egina da.