Deskripzioa eta oharrak:

Kadagua ibaiak aldenik alde igarotzen du Balmaseda Enkarterrin. Oso ezagunak dira Balmasedako eliza, estilo gotiko berantiarrean egina, eta Erdi Aroko zubia. Bigarren mailakoa da Santa Klara komentua, hau ere Erdi Arokoa.

Eliza komentuari erantsita dago, habearte bakarra du gurutzadurarekin, sabaiko leihoa eta, gorenean, bi gorputzeko kanpai horma. Bi estriboren artean kokatuta dagoen sarbideak garaipen arku baten itxura du, eta bi pilare ditu eta zurezko ate bat tinpano landuarekin. Arku gainean idazkun batek adierazten digu nola agindu zuen Joan de la Piedrak 1675ean komentua fundatzeko. Portada gainean nitxo bat dago Santa Klararen irudiarekin eta komentua fundatu zuen sendikoen bi armarrirekin.

Estriboak, portada eta markoak harlanduzkoak dira; horiek izan ezik gainerako beste guztia manposteriaz egina da.