Deskripzioa eta oharrak:

Bizkaiko sartaldean, zehazki esanda Enkarterrin dago Balmaseda udalerria. Erdi Aroko harresiak ditu eta eliza bat baino gehiago, eta horien artean ezagunena San Severino da, Salbatzailearen eliza ere esaten zaiona. Plaza Nagusian aurkitzen da.

Kanpoaldetik begiratu eta berehalaxe ikusten da eraikin gotikoa eta barrokoa dela, biak nahas-mahas. Gotikoak dira portadak, leihoak eta arrosa leihoak. Gainerako guztia barrokoa da, batez ere elizaren oinean altxatuta dagoen kanpandorrea.

Elementu arkitektoniko aipagarrienei dagokienez esan behar da, adibidez, elizaren burualdean abside poligonala duela kontrahorma sendoekin indartuta.

Bi sarbide ditu, bata mendebaldera begira eta bestea hegoaldera. Lehenbiziko sarrera bigarrena baino bakunagoa da, eta txaranbeldua da, arkibolta zorrotzekin: hauen gainean arrosa leiho bat eta bi leihate daude. Bigarren sarbideak ojiba arkuaren forma du eta oso txaranbeldua da, apaingarri ugariz betetako arkiboltekin. Arkiboltak janbetan bermatuta daude eta hauetan -goiko eta beheko partean- nitxo batzuk aurkitzen dira. Portada honetako sarrera-baoa berriztatu berri dagoen tinpano batek koroatzen du. Hormetan leihate handiak ikusten dira arku zorrotzekin, eta lehen aipatu diren arrosa leihoek ematen diete gaina bi sarbideei.