Deskripzioa eta oharrak:

Bizkaiko kostaldeko arrantza herri txiki bat da Mundaka. Gero eta turista gehiago joaten da uda pasa bertara. Gernikatik Bermeora doan errepidearen ondoan dago herria eta, bertan, herrigunean, Andre Mariaren eliza.

Oinplano angeluzuzeneko eliza da, habearte bakarra du burualde zuzenarekin, den-dena tertzeletezko eta makurdurazko gurutze gangaz estalia. Gangak euskarri gotikoen gainean bermatzen dira burualdean, eta gainerako guztian euskarri errenazentistetan. Barruan kapera batzuk ditu, oinean korua; kanpoaldetik benetan ikusgarria da elizaren hego-sartaldean altxatzen den kanpandorrea, estilo neogotikoan egina.

Barrura sartzeko bi sarrera dira. Portada bat hegoaldera begira dago eta arkua pixka bat zorrotza du, dobelaz hornitua. Bestea sartaldera zuzenduta dago eta zirkuluerdiko arkua, zutabe joniarrak eta frontoi hutsa ditu. Portada bakoitza bere arkupeak babesten du. Burualdeko okulu batetik eta hegoaldeko horman dauden arku zorrotzeko bi baotatik sartzen da argia barrura.