Deskripzioa eta oharrak:

Arabako Errioxa eskualdeko udalerri txiki bat da Moreta, eta hortxe herrigunean dago Santa Maria eliza. Bitxitasun gisa esan daiteke elizaren mendebaldean gorputz exentu bat dagoela, seguruenik bisigodoen garaikoa, horren hormetan ferra arkuak ikusten dira eta.

Elizak oinplano latindarra du, erdiko habeartea bi ataletan zatitua eta gurutze ganga izartuz estalia. Burualdean estalkiaren estiloa aldatu egiten da, petxina apainduetan oinarritutako kupula batek estaltzen baitu.

Elementu arkitektoniko interesgarrien artean aipa daitezke sakristia, ganga beheratu eta obalatua duena, eta kanpandorrea. Hori elizaren hego-mendebaldean dago, oinplano karratukoa da eta bi gorputz ditu. Beheko gorputzean saieterak irekitzen dira, goikoan, berriz, lau arkuk gordetzen dituzte kanpaiak.

Santa Maria elizako sarrerak portada errenazentista platereskoa du: basamentuan oinarritutako hainbat pilastrak Aita Jainkoari eskainitako tinpano bati eusten diote.

Barruan zenbait erretaula interesgarri gordetzen dira, eta horietan garrantzitsuena burualdekoa da: barrokoa da, eta Jasokundeari eskainita dago.