Deskripzioa eta oharrak:

Ermita arkupedun hau Igorreko Elexalde auzoan dago.

Eraikinak oinplano sakona du, arku fajoi batez zatitutako bi ataleko habearte bakarrarekin. Albo batetik sakristian sar daiteke. Hainbat kanoi gangaz estalita dago ermita.

Sarreran zirkuluerdiko arku zabal bat ikusten da, forjazko burdin sare eder batez itxita.

Sarrerako fatxadaren aurrean arkupe zabal bat dago: erditik sartzen da bertara, eta zutabe toskanar lerdenetan bermatzen da, gainean dintel bat eta estalkia dituela. Arkupeak alboetan ere bi sarrera ditu, zirkuluerdiko arkuarekin.

Manposteriaz egina da ermita, eta harlanduz fatxada nagusia eta alboetako lau ostikoak. Barruko hormak okre kolorez emokatuta daude.

Barrualdean aldare nagusia nabarmentzen da, Kristo gurutziltzatuarekin; alboetan ere bi aldare nabarmen daude.