Deskripzioa eta oharrak:

Madalena ermita Oñatiko Santxolopetegi auzoko goiko aldean dago, Gipuzkoan, Debagoieneko arroan.

Eraiki zenean ermita berez barrokoa bazen ere, XVIII. mendean zaharberritzen hasi zirenez geroztik, jatorrizkotik erantsita duen iturri bat baino ez da geratzen. Ermita honi buruz dugun lehenengo albistea 1442koa da. Antza denez, bertan jarri zen bizitzen, Jesusen Lagundiko nobizio zela, San Frantzisko Borja, egon ere, eraikinaren egiturarekin bat eginez, ermitari atxikitako etxebizitza bat badago, eta bertan San Frantzisko Borja bizi izan zela uste izan da. Ermitaren irudi titularra XIV. edo XV. mendeko irudi gotiko bat da.

Eraikineko oinplanoa gurutze latindar formakoa da, gurutzaduran ganga du eta absidearen burualdea laua da.

Sarrera nagusia mendebaldeko fatxadan dago, eta portada dinteldu batez osatuta ageri da: horren gainean frontoi txiki bat dago, zeinean, erliebean egina, kaliz bat ageri den, eta frontoian bermaturik Madalenaren irudia gordetzen duen nitxo bat ere badago. Portada osatuz, goialdean, kanpai horma txiki batek kanpaia gordetzen du. Ermitaren kanpoaldetik zenbait bao ikus daitezke, barrualdea argitzeko balio dutenak. Zehazki, absidearen alboetan bi daude, beste bat gurutzaduran, eta beste bat hegoaldeko tartean. Ermitaren eskuinaldeko aldean arkupea dago, zurezko oinarrietan finkatua.

Ermitaren egitura manposteriaz egina da, baina ertzak eta arku fajoiak harlanduzkoak dira. Barrualdea emokatuta eta kareztatuta dago.

Bitxikeria gisa aipa daiteke ermitaren antzinako irudi titularra; gaur egun, gurutzaduran ikus daitekeen nitxo txiki batean gordeta dago