Deskripzioa eta oharrak:

Eraikin hau Elexalde auzoan dago, parrokiaren parean eta hilerri zaharraren ondoan.

Bizkaiko interesgarrienetakoa da neurriagatik, oso fin landua delako, eta bigarren mailako honelako eraikin erlijiosoetan kupula izatea oso gauza bitxia delako.

Ermitak oinplano angeluzuzena du, lau isuriko estalkia eta albo banatan bi kontrahorma edo ostiko. Bi arku toralek eusten dioten kupula faltsu bat du, eta zutabe faltsuen gainean arima penitenteentzako gune berezi zabal bat.

Fatxada nagusian, eskuinaldean, burdin sare forjatu bat eta leiho dinteldu bat daude.

Atzeko fatxada hilerriko paretaren zati ere bada, eta ermitaren ertzaren ondoan portadatxo bat dago idazkun honekin: SUEK SARIENA IXAN GUINIAN GU/GU GARIENA IXANGO SARIE SUEK.

Ermita errematatuz, kanpaiarentzat bao bakarreko kanpai horma bat ageri da, albo banatan pinakulu banarekin eta gainean pinakulu bat akroterarekin. Kanpai hormaren oinarria apainduz disko formako estela bat dago.

Barruan erretaulan Jesus gurutziltzatuaren irudia ikus daiteke.