Deskripzioa eta oharrak:

Eliza hau Lezo udalerri gipuzkoarreko herrigunean dago, Donostialdean.

Habearte bakarreko eliza da, lau ataletan zatitua. Lehenengoa presbiterioari dagokio, eta besteak baino goraxeago dago, bertara igotzeko eskailera bat duela. Atal guztiak gurutze gangaz estalita daude, XVI. mendean ohi zenez, eta gurutzadura batzuek apaingarri bereziak dituzte. Oinarri angeluzuzeneko pilastra prismatikoetan oinarritzen da, eta kanpoaldean kontrahorma sendoak dagozkie. Iparraldeko horman bi kapera irekitzen dira, arku zorrotzekoak, eta hegoaldean bat. Presbiterioan bost ojiba bao irekitzen dira, beirateekin. Erdiko baoa erretaulak ezkutatuta eta kanpotik itxita dago. Koruan, bestalde, bada beste ojiba bao bat.

Eraikina harlanduz egina da.

Elizan sartzeko bi sarrera daude. Bata, nagusia, mendebaldeko horman, eta bestea, bigarren mailakoa, hegoaldeko horman; biak, kanpoaldean, arku eskartzanoak dira. Kanpoan, baoetan, hainbat elementu gotiko ikus daiteke. Bola dekorazioa duen moldura batek errematatzen du fatxada osoa.

Erretaula nagusia Bengoetxeak delineatu zuen eta Maiorak gauzatu. Alboko kapera ixten duen burdin sarea XVII. mendekoa da.