Deskripzioa eta oharrak:

San Joan eliza zaharra Balmasedan dago, Kadagua ibai bazterrean, Bizkaiko sartaldean. Uste denez, Juan Lopez de la Puente jaunak fundatu zuen, XVI. mendean.

Oinplano sakona du San Joan elizak, habearte bakarra eta kanpandorrea -oinplano karratukoa eta hiru gorputzekoa- oinari atxikia. Eliz barrura sartzeko bi ate ditu. Oinean dagoenak zirkuluerdiko arku bat du, dobelatua, janben gainean bermatua. Multzo osoa zutabe atxikitakoez inguratuta dago. Beste sarbidea geroxeagokoa da, barrokoa, eta honek ere zirkuluerdiko arku bat du pilastren erdian, eta gainean taulamendu bat tenplete batek errematatuta; tenplete barruan nitxo bat dago, gaur egun hutsik. Erabili ziren materialak ohikoak dira: harlandua ostiko, zokalo eta hutsarte inguruetan, eta manposteria gainerako guztian.