Elkarri atxikitako bi eraikinek osatzen dute multzo hau. Lehenengo eraikina, nagusia, dorre luze bat da. Oinplano karratua du, eta manposteriazko hormak; eskantzuetan eta baoen markoetan, aldiz, harlandua dauka. Alde nagusian lau solairu ditu, eta bost gainerakoetan, maldan eraikita baitago.

Alde nagusian, pilastra batzuen artean, ataripe dinteldun bat du. Pilastra horiek taulamendu zuzen bati eusten diote eta, horren gainean, triangelu formako frontoi bat ikusten da. Frontoi horren erdiko aldean honako idazki hau ageri da: "No digas lo que supieres ni hagas lo que vieres" ("Ez esan dakizuna, ez egin besteri ikusia"). Ataripe eder hori eredu klasikoei jarraituz egina da, argi eta garbi.

Sarrera horren gainean, leiho-ate-leiho egitura duen ardatza dauka etxeak (guztiak dinteldunak dira), eta gainerako aldeetan ere egitura horixe bera ikusten da, gutxi gorabehera. Dorretxe honek, halaber, armarri asko ditu, era askotako apaingarriekin. Armarri horietako batek erraldoien irudiak ditu, eta deigarria gertatzen da.

Dorre horri erantsita eraikin modernoago bat dago, eta horretan ere armarriak nabarmentzen dira. Eraikin kubikoa da, handia, eta bao sistema irregular samarra dauka. Bigarren eraikin horrek dituen armarri guztien artean ezkerrekoa nabarmentzen da: oso handia da, handiegia, eta, segur aski, XVII. mendekoa izango da.