Otume jauregia eraikin bikaina da, eta harrigarri samarra gertatzen da dagoen inguruan egotea. Eraikin bakartua da, kubikoa, eta isuri biko estalkia du. Alde nagusian harlandua du, eta manposteria eta harlanduxka ageri dira alboetan eta atzeko aldean.

Fatxada nagusian bost bao ardatz ikusten dira, bi solairutan, eta horien arteko bereizketa inposta molduratu deigarri batek egiten du.

Bost ardatz horietatik lau alboetan daude, eta leiho soilak dituzte. Erdiko ardatzean, berriz, sarbide dinteldun bat ikusten da, dobelaz hornitua eta oso handia, pilastren eta kapitelen artean jarria. Solairu nagusian ere egitura bera dago: pilastren arteko tartean zirkuluerdiko arku bat ageri da, non garai batean armarri bat izaten baitzen. Friso bat du goian, eta horren gainean, triangelu formako frontoi bat ikus daiteke. Jauregiak duen apaindurarik deigarrienetakoa da friso hori. Sei irudi ageri dira frisoan, harrian zizelkatuak: eguzkilore itxurako lore bat, haritz hosto bat, beste lore mota bat, lauki ezkatadun bat, X bat biribilean sartua eta beste lore bat.

Ezkaratz handi bat du sarreran, eta harrizko bi eskailera irteten dira hortik, eskudel molduratuekin hornituak.

Ibarraren ustez, antzinako dorre baten gainean eraiki zuten Otume jauregia; beheko solairuan saietera batzuk ikusten dira, antzinako dorre horretakoak.