Gasteizko zabalgune neoklasikoan dago Florida parkea. Oinplano trapezoidal luzatua du, eta, lorezaintzaren ikuspegitik begiratuta, bi zatitan bereizten da. Horietako bat modu erregularrean antolatuta dago, eta planteamendu neoklasikoen arabera egina da, Frantziako lorezaintza tradizioari jarraituz (zati horretako landare eta zuhaitz gehienak handik ekarriak dira). Oinplano obala du, eta bi bide nagusi igarotzen dira bertatik (zati guztia laukitan banatzen dute); bide horiek elkarri buruz perpendikularrak dira, eta eremu zirkular handi batean gurutzatzen dira, lehen zati horren erdi-erdian. Eremu zirkular horretan metalezko kiosko bat dago, 1890ean egina. Zati horretako lauki bakoitza hareharri landuz eginiko harresi txikiek mugatzen dute, eta arku txiki gurutzatuen forma duten burdinazko karel baxuak ere badituzte.

Zati horretan, parkerako sarbideetan, pitxer handiak ikusten dira, pilastren gainean. Gainera, kioskoa dagoen plazan, errege bisigodoen lau estatua daude 1821az geroztik (Madrilgo Errege Jauregia apaintzeko egin zuten proiektu barrokoaren zati dira).

Hasierako lorategia handitu egin zuten San Antonio eta Prado kaleetara, eta hor sortu zen bigarren zatia. Ingalaterrako tradizioaren eragina du zati horrek, eta izadiak leku handiagoa hartzen du. Bide bihurri batzuk ikusten dira, eta errekasto batzuk eta haitzulo artifizialen bat ere bai.