Jauntxoen eraikina da, eta Goikolexeako errepidearen ertzean dago. Eraikin bakartua da, bolumen kubikoa duena; lau isuriko estalkia du, eta bi solairuk eta ganbarak osatzen dute. Eraikinaren egitura nagusia zurezkoa da eta, kanpoaldean, material bat baino gehiago du: alde nagusian eta ezkerreko aldean silarria du beheko solairuan; alde nagusiko goiko solairuetan, adreilua; eta gainerako hormetan, manposteria .

Alde nagusian, galeria dinteldunera sartzeko, kanpoko eskailera bat dago albo batean, eta lehenengo solairuko zutabeak ikus daitezke. Horren gainean, eraikinaren gorputz nagusia dago, eta margolanak ditu apaingarri (adreilu formako eta koloreko irudiak ditu). Irudi estilizatuak dituen friso bat ere badu, eta bertan 1777 data azaltzen da.

Atzeko aldean, lehenengo solairua manposteriaz egina da, eta sarrera-eskailera bat du hara iristeko; lehen solairu horretako sarbidea ez dago erdi-erdian, eta gainean Meabetarren armarria du. Atzeko alde horrek gorputz bat du atxikita albo batean: garaiera txikiagokoa da, eta lau isuriko estalkia du.

Eraikuntza honetan baserrietan ohikoak ziren elementuak eta arkitektura landuagoan erabiltzen ziren elementuak nahasten dira. Litekeena da XVIII. mendeko eraikina izatea, eta eraikitzeko orduan zaharragoak ziren zenbait elementu aprobetxatu izana. Badirudi baserriari fatxada dotore bat gehitu ziotela, margolanekin, harlanduarekin eta kanpoko eskailerarekin; eraikin honek jauregi baten kategoria hartzen du.