Odiaga auzoko berotegien ondoan dagoen Etxenagusia baserriak oinplano angeluzuzen sakona du, eta isuri biko estalkia.

Kalitate arkitektoniko handia du baserri honek, eta horregatik nabarmentzen da. Kareharri landua du hutsarteetan eta eskantzuetan, eta manposteria erdiageria gainerakoetan. Behetik gora, beheko solairua, bizitegia eta ganbara ditu, azken hori leihatila estu bakar batekin irekia.

Beheko solairuan, fatxadaren erdian, sarbidea dago. Bi Arku karpanel ditu, eta ongi bermatuta dago, aldeetan atxikitako pilastren eta erdian jarritako zutoin baten gainean. Sarbidearen gainean medailoi obal bat dago, eta data bat ageri da bertan, baserria eraiki zutenekoa: : "ANOS / DE 1774" ("1774ko URTEA").

Sarreratik ezkerretara ur bedeinkatu ontzia moduko bat dago, kopa formakoa, goian gurutze bat duela, eta albo bakoitzean argi bao bat du.

Bizilekurako sarbidea dintelduna da, eta hara iristeko beheko ataripetik igaro behar da. Bizilekua dagoen solairuan labe bat ere bada, bere osagai guztiekin. Bost bao daude solairu horretan, eta alboetako biak besteak baino txikiagoak dira.

2004. urtean Etxenagusia berritzen ari ziren.