Berpizkunde garaian egin zituzten bizitokien adibide ona da Aprikano etxea; arkitekturaren ikuspegitik, inguru horretako adierazgarrienetakoa da. Etxebizitza multzo batean dago, trenbidearen atzean.

Alde nagusia ekialdera begira dago. Beheko solairua, lehenengoa eta ganbara ditu. Hiru isuriko estalkia du, eta gailurra alde nagusiari buruz perpendikularra da.

Beheko solairua harlanduxkaz egina du; goiko aldean, berriz, adreiluz eta zurez eginiko bilbea dauka. Lehen solairutik gorakoa zurezko mentsulen gainean bermatuta dago, eta beheko solairua baino aurrerago eramana. Alde nagusi horren goiko aldean teilatu hegal irtena ikusten da, bost beso handiren gainean jarria.

Sarbidea beheko solairuaren erdian dago: zirkuluerdiko arkua du, eta hemeretzi dobela. Sarbide horren gain-gainean, solairu nagusian, armarri handi bat ikusten da; dorre bat, bi otso eta bi galdara ageri dira armarrian (Egiluztarren armak dira).