Itxura guztien arabera, XVII. mende hasierako etxea da, nahiz eta zenbaiten ustez XVI.aren bukaerakoa izan daitekeen. Erlaitz molduratua eta teilatu hegala, ziurrenik, XVIII. mendekoak izango dira. Alde nagusiko plaka batean honako hau irakur daiteke: "En esta casa negociaron los emisarios del Príncipe Conde y las autoridades de la plaza los términos de la tregua que siguió al heróico sitio del a$#241;o MDCXXXVIII" ("Etxe honetan egin zuten negoziazioa Conde printzearen ordezkariek eta plazako agintariek MDCXXXVII urteko setio heroikoaren ondoko tregoa erabakitzeko").

Beste hainbat eraikinekin lerroan jarrita dago Casadevante etxea. Kalera ematen duen aldea harlanduz egina du, eta biribil eta lore irudiekin apainduak ditu izkinak, baina mutur bakoitzeko azken harlandua lehoi bat da. Hiru solairu ditu, inpostekin bereiziak, eta hiru hutsarte ardatz ageri dira solairu bakoitzean.

Beheko solairuan leihoak ikusten dira, ildoz apaindutako zutoinen tartean jarriak. Zutoin horiek lore irudiz apaindutako taulamendu bati eusten diote, eta gainean triangelu formako frontoia dauka, muturretan bolak dituzten pinakulu txikiekin.

Lehen solairuan hiru balkoi ikus daitezke, triangelu formako frontoiekin; erdiko frontoia hautsia da, armarria jarri ahal izateko. Bigarren solairuan ere balkoiak daude, baina frontoi gabeak dira. Bi harburu lerrok eusten diote teilatu hegalari. Muturretako harburuak harrizkoak dira, eta erronboak eta obaloak dituzte zizelkatuta.

Barruko aldean aldaketa handiak egin dizkiote, eta atzeko aldean ere bai. Gaur egun Casadevante etxea ostatua da.