Antzinako Soran jauregiak bi dorre handi zituen, eta elizaren ondoan zegoen. Gaur egungoa, Garro jauregia, Jose Garro Artolak berreraikiarazi zuen, XVIII. mendean. 1556tik agertzen dira Garrotarrak Leintz-Gatzagan, Juan Martinez Garro Oñatitik hara joan zenetik. Jose Garro Artola militar ospetsua izan zen, eta Flandesen eta Ameriketan aritu zen. Gobernadore lanak ere egin zituen Tucumanen, Rio de Platan eta Clen; Ameriketatik itzuli zenean, Leintz-Gatzagako alkate izan zen, eta Gipuzkoako kapitain nagusia. 1702an hil zen.

Garro jauregia Santiago eta San Ignazio kaleen artean dago, San Millan eliz-parrokiaren aurrean. Jauregi barrokoa da, eta forma kubikoa du. Bere bi alde nagusiak, aurrekoa eta eskuinekoa, harlanduz eginda daude, atzekoa, zatirik gehienetan, kareorez estalita dago, ezkerrekoa, berriz, ondoko eraikinari atxikita. Aurreko aldean eskuineko angelua ebakita du, ibilgailuak handik pasatu ahal izateko.

Aurreko aldeko beheko solairuan leihoak ditu, eta sarbide dintelduna erdian, dobelaz hornitua; lehen solairuan hiru balkoi ditu, eta bigarrenean hiru balkoi txiki. Teilatu hegalak harburu ilara bi ditu, landare irudiekin. Izkinako armarria oso deigarria da; Garrotarren armak ditu, eta oso ongi landua da.