Eraikin bakartua da, eta gaur egun zenbait zati txikiago ditu atxikita. Jauregiak oinplano karratua du, eta lau isuriko estalkia. Hormak manposteriazkoak ditu, eta kareorez estalita daude; izkinetan, baoetan , inpostetan eta ia alde nagusi guztian harlandua dauka.

Aurreko aldeak bi solairu eta ganbara ditu, eta bost bao ardatz ikusten dira. Beheko solairuan arkupea dago, zutoinen gainean jarritako hiru arkurekin (zirkuluerdikoak ). Arku horiek ataripe batera ematen dute, herri arkitekturan ohikoa denez, baserrietan batik bat, baina itxura landua emateko jauregiek izaten dituzten galerien formak erabiltzen zituzten.

Arkuteria horren alboetan, leiho txiki dinteldun bi ikusten dira. Beheko solairua oso garaia da, eta inposta batek bereizten du lehen solairutik. Lehen solairuan lau leiho ageri dira, dinteldunak, eta erdian, mota bereko balkoia.

Ertzetan armarriak daude, eta horietako baten ondoan eguzki erloju bat ageri da.