XVII. mendean Euskal Herriko landa eremuko ohiko euskal etxe baten irudira, harriz eta egurrez, egindako eraikin batean kokatuta dago Euskal Baserriaren Ekomuseoa. Goiko pisuan museo etnografikoa dago gure arbasoen historia islatzen duten jatorrizko 1.000 pieza baino gehiagoz osatua.

Horrez gainera, glaziaziotik hasi eta XIX. mendera arteko euskaldunen historia azaltzen duen Parke Tematikoa ere badauka museoak. Antzinako tresnak eta makinak (errota, burdinola, irindegia, arotzeria hidraulikoa, ogia egiteko labea...) ere gordetzen ditu eta horietako batzuk martxan ikusi daitezke.