Jautarkolek EAJren inguruko "El Día" egunkarian argitaratu zituen olerki asko

Hitz lauz idazten, itzultzen, hitzaldiak ematen, saiakera sakonak egiten ona baldin bazen Jautarkol, olerkari gisa bikaina zen. Olerki asko idatzi zituen, 150 inguru, eta ez nolanahikoak gainera. Olerkari lirikoa genuen. Genero hau ez zen asko lantzen euskaraz bera idazten hasi zenean. Arrese Beitia kenduz gero ia besterik ez da ageri 1920ko hamarkadan. Hizkuntza ulerterraz baina landuz, bere barne-mundua islatzen zuten olerkiak egiten zituen. Erromantikoen kutsua darie haien irudi-ugaritasunari eta sentimendu-agerpenei.