Deskripzioa eta oharrak:

Bilboko Parte Zaharrean, eliza gotiko zahar baten gainean, eraiki zen San Anton. Gerora elementu berriak erantsi zitzaizkion: kaperak, sakristia, arkupea eta portada errenazentista. Kanpandorrea, esate baterako, XVIII. mendekoa da.

Oinplano irregularra du, hirigintza arazoak direla-eta etxe artean sartuta dagoelako; hiru habearte ditu, erdikoa alboetakoa baino handiagoa, eta burualde zuzena.

Hona hemen zehaztasun gehiago gainerako elementuez. Pilare zilindrikoek eusten diote habearteen estalkiari; pilare hauek zutabe txiki batzuk dauzkate atxikita eta horien kapitelak bola eta basa zulatutakoz apainduta daude. Bizkaian oso portada errenazentista gutxi da, eta horietako bat da San Antongoa. Trazeria zabala du, arkupea eta balkoi jarraitua. Sarbidea beheratua da, nitxoekin eta zirkuluerdiko frontoiekin. Baoei dagokienez, batzuek arku zorrotza dute eta, beraz, guztiz gotikoak dira; beste batzuek, aldiz, zirkuluerdiko arku trilobulatua dute. Kanpoaldetik begiratuta dorre bat ikusten da, eta bertan zizelkatuta, estilo barrokoan, hiriko armarriak. Gaur egungo kanpandorreak barne kupula, bola eta haize orratza ditu.

Harlanduz egina da eliza. Barruan badira erretaula batzuk, eta horietatik zenbait, errenazentistak dira. Hagitz nabarmena da kapera batean ikusten den burdin sare forjatua.